2001: A Space Odyssey
ياساتر، اقسم بالله اني طوال الفلم مندهش من الفكره الي الكاتب يطرحها والجنون انها تنفذت بهذا الشكل العظيم.
اول 26 دقيقه بدون اي كلمه، بالمعنى الحرفي مافيه اي كلمه نُطِقت، نصف ساعه تقريبًا كانت بالمعنى الحرفي تجسّد اسم الفصل "Dawn of men” ، ولو اني أبغض نظرية التطوّر وتمنيت ان ستانلي يضع بدال القرده بشر بدائيين ولكن كانت فكره عظيمه والله.
المونوليث والي ما اعرف الصدق وش معناها بالعربي رغم انها مرت علي كثير الا اني اعتقد بأنها تجسيد لفكرة تطوّر البشر، في كل مره ظهرت كان فيه بعدها انتقال كلي للبشر بداية من القرده الى ان تحول دايف للطفل النجمي.
الفلم واضح انه ابتعد عن الكلمات وركّز على المشاعر، كل دقيقه في الفلم وكل حدث كان يسير فيك إلى نهاية مفتوحه اشوفها من اعظم مامر علي، والنتيجه؟ انت وجوابك، افتح المجال لخيالك واطلع بأي نتيجة تراها، رغم تجاربي الكثيره السيئه مع النهايات المفتوحه الا اني حبيت هذي بشكل مب طبيعي.
الانتاج، الاخراج، الموسيقى، الافكار، كل شي جعلني اشعر اني جالس اشاهد فلم تم صنعه بالالفيه الجديده، بعيد عن جنون الفكره واستحالة تطبيقها بالشكل المهول هذا، كيف خطر لكيوبرك انه يحوّل فكرته لفلم؟ كيف كان واثق ان الفكره العجيبه هذي ممكن صدق تُنقل الى عمل حي .. هالكلام قبل ٦٠ سنه تقريبًا والله شي مب طبيعي.
والله اني انهيت الفلم وقلت معقوله هذا قصد الكاتب؟
معقوله اني فهمت الفلم بالشكل الصحيح؟ معقوله؟
الفلم يطرح تساؤلات كثيره كثيره، علاقة البشر بالتقنيه، مصير البشر الحتمي بالتطور، تعامل البشر وكيفيته مع هذا التطور، علاقة التطور البشري بالوجود الكوني المجهول، هل البشر بالفعل مركز الكون؛ ام ان الغرور جعلنا نعتقد هذا.
مجرد التفكير بأن الفلم ابتدأ وسط القرده وانتهى بين النجوم، يجعلني في حالة عدم تصديق بأن فيه عمل حقيقي سوا هالشيء.
تجربة عظيمه عظيمه والله والاعاده مطلب ⏳.