About Time
الوقت، حاجة أغلبنا بيهملها و بنوصل لنقطة معينة في حياتنا بندرك فيها قد اي الوقت اللي فاتنا ده كان ليه قيمة مكناش مقدرينها ساعتها، أوقاتنا مع عيلتنا، مع أصحابنا، أوقات الفرح و الزعل و الوحدة و اللمة، حاجات مش بنديها أهمية غير بعد فوات الآوان.
ماذا لو الشخص كان عنده القدرة إنه يرجع بالزمن وقت ما يحب، يعيد اللحظات الحلوة، ويصلح اللحظات الوحشة، و يكون مع الأشخاص اللي بيحبهم تاني.
الفيلم بيتناول رحلة "تيم" اللي والده بيفاجئه بعد عيد ميلاده 21 إن الذكور في عيلتهم بيقدروا يسافروا عبر الزمن لكن مش سفر كلي، سفر خلال فترة حياة الشخص اللي هيسافر بس و ميقدرش يسافر لوقت قبل ولادته أو لوقت في المستقبل، "تيم" بعد ما بيتأكد من كد بينطلق في رحلته للبحث عن شريك حياته و العثور علي الحب اللي دايماً كان بيسعي إليه، بيقابل "ماري"و بتدور أحداث الفيلم بعد كدا حواليهم الإتنين و حوالين "تيم" شخصياً.
الفيلم رغم بساطة فكرته و رغم إنه مقدمش اي تفسيرات للقدرة اللي عند عائلة "تيم"، و ازاي هما بيقدروا يسافروا، لكنه بيقدم فيلم عميق جداً بيدور علي معني السعادة و بيطرح أسئلة فكرية كتيرة في دماغ المشاهد زي مثلاً لما نشوف "تيم" بيتهرب من كل المواقف المحرجة عشان يعيدها تاني و يتصرف فيها بشكل أحسن و ده يخليك تسأل: هل قدرة "تيم" هتأثر علي نضجه ؟ هل فعلاً المواقف الوحشة و المحرجة اللي بنمر بيها بيكون ليها دور في تشكيل شخصيتنا و نضجنا فكرياً و عاطفياً ؟"تيم" بيمر برحلة رائعة جداً بيكتشف خلالها إن مش لازم ترجع بالزمن كل شوية عشان تستمع باللحظة و عشان تقدرها لإنك بإيدك إنك تقدرها و تعيشها بكل تفاصيلها في الحاضر و لما اللحظة تنتهي تدرك إن اللحظة انتهت لإن ده مصيرها زي ما هو مصير كل حاجة وإن النهاية هي اللي بتعمل للحظة قيمتها.