Midsommar

الفيلم بعد ما يخلص هتسأل نفسك إي الهدف من الفيلم ده ؟  يعني لي ممكن واحد فعلاً يتفرج علي الفيلم ده؟ فيلم بيورينا الشر بصورة مش مألوفة لأغلبنا عكس الشر اللي متعودين عليه في الضلمة و الرعب و إحساسنا بالخوف مع كل حركة غير متوقعة، الفيلم تقريباً كله منور و ألوانه زاهيه جداً و مريحة للعين لكن رغم كد الشر بيتجسد قدامنا في الفيلم بطريقة بتخليك مش مرتاح و أنت بتتفرج و بيجيلك إحساس بالضيق كأن المخرج بيقولك الشر بيفضل شر مهما كان مكانه وإنك مش هتقدر تهرب منه.طول الفيلم بتسأل نفسك سؤال: هو ازاي الناس دي كدا ؟ ازاي محدش فيهم فكر إن ده غلط أو حتي فكر يشكك في اللي حواليه ؟ ده سؤال شخصياً مقدرتش أوصل لإجابة عليه، لأن فعلياً مفيش في كلامهم أي غلط، الناس مؤمنة إيمان تام باللي هما بيعملوه، و معتبرينه صح 100‎%‎ مفيش شك فيه، و الفيلم مش بيورينا أي نظرية مؤامرة أو حد بيتحكم في الناس دي بهدف معين، دي ناس فعلاً فعلاً مؤمنة باللي هي بتعمله و مصدقين جداً لإعتقاداتهم لدرجة التضحية بالنفس بدون أي تراجع و لو للحظة في القرار ده.كمان بنشوف في الفيلم رمزيات كتيرة بتعبر عن نهايه أغلب الشخصيات و عن الاتجاه اللي الفيلم رايحله، و بنشوف فيه حاجات زي ابتلاع المجتمع للفرد، وإنك يتبقي فرد من المجتمع بالذوق أو هما هيخلوك بالعافية، طبعاً غير إسقاطات كتيرة في الفيلم و حاجات كتيرة ممكن تتحكي فيه. و في النهاية تتفرج ع الفيلم لي؟ لإنه تجربة مختلفة مش هتندم عليها.