Catalog
مبدأيا، انا مبهور بحلاوة الكتابة والسيناريو بالذات بعد ما عرفت انهم من ايمن وتار، حتى لو مش كل حاجة عجبتنى فى السيناريو بس بجد مش مهم. المكافأت حلوة جدا وكتيرة اوى وكفيلة تنسيني اى حاجة وحشة ودة واضح فى التقييم. وانا هنا مش جي اتكلم عن المشاكل، انا اتبسطت جدا بالتجربة وارشحها لاي حد بس متنساش علبة المناديل.
انا كنت بتفرج على الافلام القصيرة بتاعت ويس اندرسون على نتفلكس، لما خلصت جالى ترشيح من المنصة انى اشوف مسلسل كتالوج وانا مكنتش اعرف عنه حاجة لسة فالحلقة الاولى اشتغلت لوحدها وانا قلت اجرب يعنى. عايز اقول ان الحلقة الاولى pilot ممتاز سواء من تقديم الفكرة او تقديم الشخصيات بسلاسة. عرفت كل حاجة محتاج اعرفها وفهمتنى احنا رايحين على فين وشدتنى اكمل فعلا. انا عموما بحب جدا اجواء المسلسلات المصرية اللى معمولة حلو كدة، يعنى فكرنى علطول بموضوع عائلي مثلا. وكالمتوقع شفت حلقة ورا التانية. احلى binge-watch.
المسلسل ضحكنى بصوت فى لحظات كتير وكان فى نفس الحلقة بيخلينى اموت من العياط. اول ٤ حلقات دول اثروا فيا وخلوني اعيط قد كل حاجة اتفرجت عليها من فترة كبيرة. ودة حاجة شخصية ليا بصراحة بسبب الكونسبت نفسه وفكرة المسلسل اساسا. "الفقد" لما تخسر حد عزيز عليك بالذات لو زى المسلسل كانت الام اكتر حد عزيز عليا... مبقدرش اتفرج على حاجة زى كدة بسبب اني غصب عني بتخيل نفسي مكانهم. فصعب اوى عليا حقيقي.
بس لك ان تتخيل الحالة اللى كنت ببقى فيها دى وبعدها بمشهدين مثلا يقدروا يخلوني اضحك. اكيد مش كل المحاولات الكوميدية نجحت بس اللى نجح منهم نجح بامتياز.
وطاقم التمثيل مبدع وكتير ابهرونى من اول علي البيلي اللى خلاص اثبت نفسه كممثل شاطر مش مجرد طفل بيعرف بيمثل، احمد عصام مفاجأة حلوة جدا وعجبني، خالد كمال اللى عنده قبول رهيب ما شاء الله وبيستمر فى الابداع، وسماح انور اللى بجد بونبوناية المسلسل، حقيقي عثل موت العمر مجرد رقم. صغرت ٢٠ سنة فى الدور. بتحركلنا كل الشخصيات فى القصة وبتضحكنا باقل مجهود. واكيد طبعا ريهام عبد الغفور اللى كفيلة بمشهد واحد تقتلني، ومحمد فراج اللى مكانش ١٠/١٠ فى كل المشاهد بس لحظات توهجه جميلة ونقلي احساس جميل. دة حتى ضيوف الشرف كلهم حلوين جدا واختيارات عبقرية كمان.
شكرا لصناع العمل على الحالة اللى دخلوني فيها واتمنى بجد الاعمال اللى شبه كدة يتعمل منها كتير الفترة الجية. وربنا يخليلي امي وجميع الامهات. ومحدش يأجل التعبير عن حبه. قوموا احضنوهم وقربوا منهم، وادعولهم بالرحمة لو كانوا فارقونا.