Magic Eye

اول انطباع عنه من الاول خالص إن في شغل عالي بيتقدم. كل حلقة كانت احلى من اللي قبلها، وكل حلقة فيها حدث جديد يخدم القصة بشكل واضح. المسلسل اصلا مكنش في الخطة خالص، شوفته بعد الحفاوة الكبيرة من الناس على اول حلقة، وكانت اول حلقة أشوفها في رمضان. والبايلوت كان ممتاز جدًا وخلى عندي فضول اكمل. اول كام حلقة كانوا بيقدموا رمزيات لطيفة وسيناريو ممكن يتقال عليه شبه مثالي. أفكار بتتزرع بدري، وتقلبات وتطور في الشخصيات محسوبة ومتمكنة. كل ده كان بيكبر حلقة بعد حلقة لحد ما وصلنا لكلايماكس الحلقة الخامسة، واللي كانت بالنسبة لي وقتها احسن حلقة شفتها بين كل مسلسلات الموسم. السرد البصري هنا رائع. إخراج شاطر جدًا، وسينماتوجرافي ليها معنى مش مجرد لعب بالكاميرا وخلاص. حاجات ممكن تبان بسيطة، بس للاسف مش بنشوفها كتير عندنا. كادرات جميلة، واللمسة البصرية للسدير مسعود كانت واضحة ومميزة. أما التمثيل فكان في مستوى تاني خالص. مباريات تمثيلية قوية بين عصام عمر وباسم سمرة. عصام عمر مع كل عمل بيثبت قد ايه هو موهوب ومتمكن، وباسم سمرة بيأكد مرة بعد مرة إنه واحد من اهم الممثلين في تاريخ مصر. الأداء الواقعي جدًا منهم كان بيخليني حرفيا احس اني معاهم في المشهد. وده بيترجم في الاخر لدموع غصب عني. فاكر مثلًا الحلقة العاشرة، كل مشهد تقريبا كنت بلاقي دموعي بتنزل. الاداء كان صادق لدرجة انك بتحط نفسك مكانهم بسهولة. كمان الولد عمر شريف كان مفاجأة لطيفة وموهوب فعلًا. ولما دخل محمد علاء في الاخر، شفنا مباريات تمثيل ثلاثية من طراز رفيع. محمد علاء عنده كاريزما غريبة. نظراته لوحدها بتتكلم، وحضوره كان مرعب بصراحة. لكن رغم البداية القوية جدًا، السيناريو دخل في شوية مشاكل من حوالي الحلقة التاسعة. في حاجات غريبة ظهرت فجأة، زي شخصية أسماء مثلًا اللي حسيتها مش متماسكة قوي، وكمان سهولة وصول عادل واختراقه لكل مكان. وحوار الفيديو في النهاية كان محتاج معالجة أدق. بس بصراحة، لما بتتجاوز الحاجات دي وتركز على المكافآت اللي المسلسل قدمها، تلاقي إن التجربة كانت ممتعة جدًا بالنسبالي. ضحكت، عيطت، واتشديت للأحداث… ومسلسل زي ده أكيد هيفضل في بالي. "لو محققناش العدالة في الأرض يبقى عمرنا ما نستاهلها في السما." ويمكن أحلى حاجة إن تقريبًا كل التخوفات اللي كانت عندي بخصوص النهاية محصلتش. النهاية عجبتني، وقدّرت محاولتهم يقدموا حاجة مختلفة نسبيا عن النهايات المعتادة. شكرا السدير مسعود. شكرا عصام عمر. شكرا باسم سمرة. شكرا محمد علاء.