Beautiful Boy

الصراحة واو كنت متوقع اقل من كذا لكنه صدمني الصدق وناسبني بشكل عجيب فلم يركز على علاقة الأب والأبنه وصعوباتها وكيف أن الإدمان قادر يدمر البيت كامل مو الشخص فقط الأب بهالفلم قدرت أحس بثقله النفسي طوال الفلم، شفت كيف حاول ينقذ أبنه بجميع الطرق وأضطر يقلب حياته ويعاني عشان يقدر يرجع أبنه وكيف كان عايش بين الأمل واليأس، والأصعب إننا نشوف محاولاته تنهار قدامه، بكل مره يرجع فيها الأبن لنفس النقطة نشوفه يتألم فعلاً وذا الجانب الأبوي كان جداً مؤثر وقريب بالنسبة لي لأنك تحس أنك قدام معاناة عائلة كاملة مو بس قصة إدمان. ومن جهة الأبن ف هو عايش مراهقة مضطربة مابين ضياع وفقدان هوية وذات والرغبة من الهروب من الواقع ومن أي شعور ثقيل، ومع كل خطوة نكتشف أنها فالحقيقة خطوة للوراء وضياع أكثر لهوالشيء الأصعب والأجمل فالفلم أنه مايبرر أفعال الأبن، بل يحاول أن يخليك تتفهم حجم المعركة الصعبة اللي يخوضها الأبن وكيف أن الإدمان مو مجرد عادة بل حرب نفسية مُدمرة للنفس وللجسد. شخصياً أنا من أكبر المحبين للأفلام اللي تعرض الواقع مثل ماهو من: إنهيارات بطيئة، وعودات صعبة من بعد الإدمان، وضع عائلي على وشك التفكك، والوحدة اللي عايش فيها الأب والأبن، العجز اللي يعيشونه كعائلة، كلها أمور نقلت لي إحساس واقعي وثقيل الصدق  والنهاية كانت ممتازة بالنسبة لي ومؤثرة جداً وبسيطة  هالفلم ماتوقعت تحربته الدرامية تكون ممتازة بهالشكل، قد أكون أبالغ بسبب قربي العاطفي لهالنوع من القصص ومعرفتي الشخصية لصعوبة تجاربهاولكن بشكل عام اشوفه يستحق كل هالكلام. “When you mourn the living that’s a hard way to live”