Sentimental Value

هيبقى اطول ريفيو اكتبه عن فيلم لحد دلوقتي فلو حد مهتم عموما وقدر يقرأ الكلام كله يبقى كتر خيره والله مبدئيا كده الفيلم ده غريب، هتقولي ليه هقولك علشان الفيلم ده في عالم عادي خالص، لا عالم مليان مجانين ولا عالم مليان كائنات فضائية ولا فيه اي اكشن وريتم عالي بربع جنيه، والفكرة ان الفيلم نفسه حلاوته في كده، هي القصة كلها قائمة على فكرة العلاقة الأسرية والتراكمات اللي حصلت من زمان، ومبدئيا كده انا كنت مستني في الاخر ان الاب يبرر لنفسه اللي عمله وكان في فكرة جاهزة في دماغي بس ده محصلش علشان يخلي الحوار واقعي، اصل في الاول وفي الاخر حتى لو حصل ايه الاب غلط مش لازم نبررله نيجي بقى للقصة، بصراحة هي قصة ممتازة وفكرة انك تطلع نتيجة من قصة زي دي لو اي حد تاني معاه نفس الفكرة عمره ما هيعملها بالشكل ده ودي حاجة تحسب ليواكيم ترير في الفيلم التمثيل، مبدئيا كل الممثلين تمثيلهم حلو بس احنا هنا هنركز على تلات ممثلين: ريناتي رينسفي، ستيلان سكارسجاد، و ايل فانينج اول واحدة ريناتي رينسفي بصراحة ده اول فيلم اشوفه ليها وحقيقي هي موهوبة جدا وقدرت تعمل الدور بإتقان شديد وتخليك مشدود معاها من الاول للاخر، ده غير ان مشهد قرايتها للسيناريو كان مشهد تمثيلي جامد اوي منها ولما تتفرجوا هتعرفوا ليه تاني ممثل وهو ستيلان سكارسجاد وبصراحة شابو يعني مقدرش اقول غير كده الراجل ده قادر يمثل بالمهارة دي في السن ده ويطلع بدور المعفن والاب والمخرج والشغوف يعني مفيش اكمل من كده تالت واحدة ايل فانينج وبصراحه يعني البت دي ملهاش في التمثيل أداء شبه معدوم تقريبا مجاتش الفيلم اصلا مفيش غير مشهد واحد اللي مثلت فيه عدل وتقريبا الولد الصغير بيعرف يمثل عنها في الفيلم الفيلم ريتمه بطيئ وده طبيعي علشان القصة بس في نفس الوقت الفيلم حلو اوي في نواحي كتير ودافئ وبيخليك متأثر جدا مشكلتي الوحيدة معاه هي الأجندات، يعني في مشهد كامل مكانش ليه اي ستين لازمة غير في جملة معينة وكان ممكن يتم اختزاله في الجملة دي ونرمي باقي المشهد بدل ما في الاخر طلعت اتنين ليزبيان مخصوص علشان مشهد هما ملهمش علاقة بيه اساسا تقييمه 4/5 علشان الأجندات للاسف