Indigenous
بدأته متأخر بعد ما كنت مأجله شوية. لكن اول حلقتين شفتهم ورا بعض كانوا كفيلين يدمروني نفسيًا.
الموضوع مش ابتزاز عاطفي خالص… في قصة وحدوتة حقيقية بتتقدم، وشخصيات بنتعلق بيها فعلا، وبنشوف من خلالها اهوال ومعاناة شعب كامل.
المسلسل بيقدم قصص درامية متنوعة ومتماسكة، مع جودة إنتاج واضحة، وسرد يوثق لواقع قاسي جدا. عملية إبادة منظمة ضد اهالي غزة، وظلم وتهجير مستمر ضد اهالي الضفة.
كنت منغمس جدا في الفرجة ومحستش بالوقت خالص. حاسس اني عايش معاهم لحظة بلحظة.
طبعًا المسلسل مش خالي من العيوب. في خطوط درامية اقل من غيرها. وبرده زي ما في ممثلين قدموا اداءات ممتازة او مثالية كمان، فيه غيرهم وجودهم مكنش ليه لازمة اوي وبيقلل شوية من جودة التجربة والتواصل مع الاحداث.
لكن بصراحة المميزات كانت أكتر بكتير جدًا من العيوب.
حاسس إن المسلسل مش واخد حقه خااالص. غالبا بسبب اسم المخرج. او انه مش مسلسل رمضاني يعني ومشاهدته تقيلة وصعبة. لكن بصراحة العمل ده يستحق مشاهدات ونقاشات وانتشار اكبر بكتير.
لو هتكلم عن التمثيل، ف إياد نصار قدم بالنسبالي افضل اداء في الموسم كله لحد دلوقتي.
مجرد ما يبدأ يتكلم كنت بلاقي عيني بتتملى دموع. وجع الشخصية كان حقيقي جدًا.
الحلقة الأخيرة بصراحة كنت مستني منها حاجة أكبر من كدة. حسيتها غريبة شوية على اجواء العمل، وكان فيها بعض الكروتة في التقفيل.
بس برده لازم اقول اني شفت اخر تسع حلقات في يومين. التجربة كده ورا بعض كانت صعبة جدًا نفسيا… لكنها قوية. عيطت كتير وانا بتفرج. مسلسل درامي بامتياز.
ممكن حد يقعد يقول في مشاكل هنا وهنا… لكن الصراحة انا مشغلتش بالي بده كله وقتها. قصة معمولة بحب واثرت فيا وحبيت الرحلة.
بتفرج على معاناتهم والدموع في عيني.
بتفرج على فرحتهم والدموع في عيني.
بسمع نكتهم والدموع في عيني.
عجبني خفة دمهم وسط كل ده. روحهم الحلوة اللي لسه متمسكين بيها رغم كل المعاناة.
ابطال بجد. ربنا معاهم 🙏🏻❤️
#ramadan series