Arrival
ok mr denis i will watch dune 1&2
قررت اتابع الفلم بسبب الموسيقى الي مستخدمه فيه وفي هامنت وشتر ايلاند يعني اغرب نوع تسويق مر علي
دينس وزير المناظر الخلابه والسنما الجديده اتوقع انه فتح عندي نوع فوبيا جديد فوبيا الاشياء لعملاقه
الفلم كله على اعصابي اقسم بالله مشدود شد كني معهم والله استنزفني حبس انفاسي
طيب والمهم الحين وش هي رسالة الفلم ؟ الفلم مليااااان طبقات وسولف عن اكثر من شي وابرزها هو الاتي
اول شي والسطح وهو طبعا الكلمه واللغه والتواصل فعلا كان عندي هالسوال من زمان الا وهو ان اللغه سبب في طريقة تفكيرك وممكن يتغير تفكيرك حسب اللغه الي تتكلم فيها شي جدا رهيب ومثير للاهتمام ودي القى فلم يستثمر في هالجانب ويركز عليه اكثر
ثانيا انا اتوقع لو صار هالشي بالحياه الواقعيه هذا فعلا الي بيصير بغض النظر عن النهايه , البشر معدومين الدول بتتهاوش ومحد بيسمع الثاني والمواطنين على عماها محد بيثق في الي اعلى منه ويحسبون ان توترهم هذا بينحل اذا احتجوا وتظاهروا بطريقه عشوائيه وهم بس يخربون وراعي البودكاست يا الله كيف طالع شكله غبي وهو يسولف بس حنا نشوفه كذا لاننا نعرف لكن باقي العالم يشوفونه مقنع وكلام منطقي وهذا الي يخوف في قوة الكلمه وكيف ان احيان عادي تسلم الامور مو لازم تتدخل عشان تحس نفسك بطل وساهمت
اهم نقطه السلاح الي قدموه الفضائيين الا وهو معرفه المستقبل والخروج عن اطار الزمن , قوة الفضائيين ما كانت بحدمهم ولا قدراتهم ولا قوتهم ولا التكنولجي المتقدمع بالعكس سلاحهم الي قدموه عشان ينقذهم بعدين هو بس انهم متعايشين مع المستقبل ولا يحاولون يغيرونه وهذا يجاوب على اكثر سوال ينسال بعد الفلم هل قرار لويز صح ولا اناني , انا اشوف انه طبعا صحيح والصلا القدر حتى بفكرته المطروحه هنا لا مفر من تغييره الواضح اما تقديمه او تاجيله , لذلك ان تختار انك تعيش اللحظات حتى لو انت عارف نهايتها هذي السعاده الصدقيه ليه تغيرها عشان النهايه , الالم جزء من التجربه وهو الي يعطيها اغلب قيمتها وكمالها , الحياه لو ما بنموت ما كانت غاليه علينا لهدرجه , ولويز اخذت هذا المسار بحذافيره لدرجة انها نست النهايه الي شافتها من كلام الجنرال شانغ يوم قال انا الى الان مدري كيف يشتغل مخك , لكن الواضح ان حتى شانغ جته القدره هذي واتوقع انه حتى هو ما غير شي بناء على كلامه لان هذا جوهر الحياه وطعمها انك تعيش كلشي فيها ولولا الحزن ما وجدت السعاده , كنك تعطي واحد تاريخ وفاته راح يسوي كل شي يحبه الى هذاك الوقت بدون خوف او ندم زي ما كان يقول الدكتور الثاني يوم سالته هل لو شفت حياتك بتغير شي ؟ كان جوابه اني بس بقول مشاعري اكثر , وهذا الجواب الصحيح اذا بتغير شي غير انك تعيش اللحظه اكثر فقط لا غير , وشفت ريفيو هنا قال انه يذكره ب جملة لو عرضت الاقدار للانسان لاختار ما اختاره الله له بما معناه ف فعلا القرار الصح حتى لو يمديك تغير
حياتك , ماراح تلقى افضل من حياتك الي انكتبت لك بدون تدخلك , سبحان الله
عش حياتك باللي هي عليه , الحزن هو مجرد اختيار